سةمايةك بؤ ئةوين ..... ثؤلآ سةعيد

به‌هارێكه ئه‌ویینت گوڵی

به‌رئێخه‌ و سنگی بوونمه،

به‌هارێكه ناوت خۆری هه‌ڵهاتووی ته‌مه‌نم و

په‌لكه‌زێڕینه‌ی دوای بارانی

په‌خشان و شیعرمه،

وه‌ره‌ گوڵم

له‌ جه‌ژنی یه‌كه‌م به‌هار دا

سه‌مایه‌ك بۆ ئه‌ویین بكه‌ین

ده‌ست له ملانێی به‌سته‌ و شیعر

له به‌رهه‌یوانی ئێوارانی ئه‌خۆل و گۆران دا

چرایه‌ك بۆ دڵمان هه‌ڵبكه‌ین،

به‌هارێكه گوڵم

بوویته شه‌می هه‌ڵكراوی ماڵی چۆڵ و

خه‌م لێنیشتووی دڵم،

فه‌رهه‌نگێك بوویت له له‌نجه‌ی فڕیینی په‌روانه‌ و هه‌نگ

بۆیه وه‌ك گه‌ردانه كردمیته‌ ملم،

تاڵێك له پرچی زێڕیینی دیوانی نالیی بوویت

له هه‌ركوێ بایت چراخان بوو هه‌وارت

وه‌رزی میهر و په‌ڵه‌ی به‌هارێكی پڕ گوڵوگوڵزار بوویت

شه‌كر ده‌باریی له‌ ده‌م و زارت،

به‌هارێكه كۆرپه‌ی ئه‌م حه‌زه

له بێشه‌ی ئه‌م دڵه‌ نه‌سره‌وتووه‌مدا ڕاده‌ژێنم

وه‌ك مه‌لی كۆچه‌ریی ساڵ

سه‌مای ئه‌ویینێك له كوێستانی ته‌مه‌نمه‌وه

بۆ گه‌رمێنی دڵت دێنم،

02.06.04