|
|
|
13-05-2011 05:06 |
|
|
|
باهینده له نرخی ڕێفراندۆم كه‌م نه‌كه‌ینه‌وه !.... مةهدي خاليد خةمبار
یه‌كه‌م جاره كه‌به‌م جۆره كورد خۆی له‌سایه‌ی جۆرێكی ئازادیدی ده‌ربڕیندا بتوانێت ئه‌وه‌ی كه له ناخیدا ژه‌نگی هه‌ڵهێنابوو تا به‌په‌نگ خواردنه‌وه‌دا ده‌گات، ئازادانه ده‌ریببڕێت ! بۆیه ده‌بێت به‌لامانه‌وه هێنده ئه‌وه به‌هه‌ن هه‌ڵ نه‌گرین كه‌ئاخۆ چ كه‌سێك یان ده‌سته‌یه‌ك یان لایه‌نێك یان ناوچه‌یه‌ك ڕیچكه‌شكێنی ئه‌م بانگه‌واز و ده‌ربڕینه‌یه تا دوچاری دڵه‌ڕاوكێ و مه‌قۆ مه‌قۆمان بكات و ڕیگا له‌خۆشمان و كه‌سانی تریش تاریك بكه‌ین، یان ئاوی سارد بكه‌ین به‌سه‌ر كڵپه‌ی جۆشدراوی نه‌ته‌وایه‌تی ده‌رونی ده‌یان و بگره سه‌دان كه‌سی تریشدا كه ڕۆژگار و ئه‌زمونه‌تاڵه‌كانمان تا سه‌ر ئێسقان توشی دڵه‌ڕاوكێی و بێ ئومێدی و ڕاڕایی كردون و وه‌كو مارانگاز له‌خشه‌ی مارمیلكه ده‌ڕه‌وێنه‌وه ! به‌لای منه‌وه گرینگ ئه‌وه‌یه كه ئایه ئێمه چۆن بتوانین خۆمان له‌و دڵه‌ڕاوكێ و ڕاڕاییه رزگار بكه‌ین و به‌پێجه‌وانه‌وه كار بۆ دروستكردنی ئیراده‌ی گه‌له‌كۆمه‌كی و هاوكاری دڵسۆزانه له پێناو سه‌رخستن و به مه‌نزڵ گه‌یاندنی پرۆسكه بكه‌ین كه به هه‌قه‌ت له‌به‌رژه‌وه‌ندی گه‌له‌كه‌ماندایه ! خۆ ئه‌گه‌ریش هه‌ر كه‌سێكش یه‌كه‌م كه‌س و یه‌كه‌م گروپ بوبێت كه له‌م مه‌یدانه‌دا ئه‌سپی ئه‌م بیرۆكه نه‌ته‌وایه‌تیه‌یان تاو دابێت و له‌كامه‌شاره‌وه بیرۆكه‌كه هه‌ڵقوڵا بێت به‌لامه‌وه گرینگ نیه به‌قه‌د ئه‌وه‌ی كه هه‌ڵسوڕینه‌رانی كاره‌كه كوردن و له شارێكی كوردستانیشه‌وه سه‌رچاوه‌ی گرتوه و كاره‌كه‌شیان له‌لوتكه‌ی دڵسۆزی و به‌ئه‌مه‌ك بونیانه‌وه بۆ دۆزی ڕه‌وای نه‌ته‌وایه‌تیمان و كۆتایی پێ هێنانی ژیر ده‌سته‌یی و خولانه‌وه‌مان له چاره‌نوسێكی نادیاردا! به‌ئه‌ركیشی ده‌زانم وه‌ك هه‌ر تاكێكی كورد ده‌ست خۆشیان لێ ده‌كه‌م. ڕه‌نگه هه‌ر ئه‌و كه‌سانه‌ش ڕوی پرسیاری خۆیانم تێ بكه‌ن و بڵین به‌چی ده‌زانیت ؟ مرۆڤێكیش ئه‌گه‌ر به‌چاوێلكه‌ی ڕه‌شه‌وه ته‌ماشا نه‌كات و سه‌رپێیانه و بێ قوڵ‌بونه‌وه‌ش بڕوانێته ده‌وروبه‌ری خۆی و ئه‌و هه‌ڵپه‌هه‌ڵپه‌ی دوژمنانی گه‌لی كورد له نزیك و دور، ڕه‌ش و سپی چاو لێ بكات گوێ بۆ لێدوان و باس و خواسه‌كانیان بگرێت، بێ گومانم كه بۆ ئه‌ویش وه‌ك من و ده‌یان ناسیۆنالیستی تری نه‌ته‌وه‌كه‌مان ڕاستیه‌ك به‌رجه‌سته ده‌بێت و له دوو‌توێیدا وه‌ڵامێكی بێ پێچ و په‌نا بۆ خۆی و نوسین و بۆجونه‌كانیشی ده‌دۆزێته‌وه. لێره‌دا ده‌مه‌وێت ڕاشكاوانه‌بڵێم كه هه‌ر ئه‌م ڕیفراندۆمه‌ی كه هه‌ندێكمان به‌هۆی ئه‌و تۆمه‌ت دانه‌پاڵه‌یه‌وه هێنده به‌سوكی باسی لێوه‌ده‌كه‌ین و له‌گرینگی و سه‌نگی كه‌م ده‌كه‌ینه‌وه ! ئه‌وه‌تا خۆشبه‌ختانه ئۆقره‌ی له‌به‌ر ناحه‌زان و دوژمنانی نه‌ته‌وه‌كه‌مان له عه‌ره‌ب و تورك و فارس بڕیوه و هه‌راسانی كردون و ئه‌وانیش له ترسی نادیاری و ته‌مو مژاوی بوونی چاره‌نوسیان سه‌دام ئاسا كونه‌مشكیان لێ بوه به‌قه‌یسه‌ری و هه‌مو هه‌وڵ و توانایه‌كی دیبلوماسی و سیاسی و چاو سوركردنه‌وه و ڕاگه‌یاندنیان له‌پێناو له‌بار بردنیدا به‌گه‌ڕ خستوه ! بۆیه تكا له‌و خاوه‌ن خامه ڕه‌نگینانه ده‌كه‌م كه‌په‌رۆشی گه‌له‌كه‌مانن با هێنده له‌به‌رابه‌ر ڕێفراندۆم و ڕاپرسیدا ڕه‌شبین نه‌بن و ژیرانه‌تر بیر ی لێ بكه‌ینه‌وه چونكه ڕیفراندۆم هێنده‌ی دوژمن و دژه پلان زۆره كه پیویست ناكات خۆشمان نا ئاگایانه و نه‌ویستانه دژایه‌تی بكه‌ین.
m. shwani@kolumbus. fi
|
|
|
