سی نامێن كورت ... تریفه دۆسكی
(1)
ماچ و سلاڤ ژ ته‌ڕا
من دڤێت بزانم ئه‌ز د هزرا ته‌دا چمه؟
گونه‌هه‌كا پاقژم وه‌ك كچه‌كا پاك ب گولله‌كا بی ده‌نگ نڤست بیت؟
ئه‌گه‌ر ئه‌و گونه‌ه بم سوپاس بۆ ڤی
به‌رائه‌تی…
(2)
كه‌نگی دی هێی
سنوری زه‌مه‌نی دگه‌ل من. . ب گولێن عه‌مر درێژ بشكینین. . ؟
هه‌ناسان تێكه‌ل كه‌ین. . ؟
وه‌ك ره‌نگێن تابلۆیه‌كا هه‌رزه‌كار بفڕین
بتنی دوو روح بی بال. . بی هزر. . بی كه‌له‌خ. . بی تبل
بتنی ئه‌ز دناڤ ته‌دا. . ، بتنی تو دناڤ مندا
بچین سه‌مایه‌كا بله‌ز بكه‌ین
فریشته
ئه‌سمان
هه ور و ستێر
هه‌موو ته‌ماشه‌ڤانێن مه بن
ئه‌م دوو سه‌ماكار بین. . كه‌نگی دی هێی. .
(3)
ب دێمه‌كی هه‌لزیڤه و گرنژینڤه
بله‌ز وه‌كو ماچا په‌لاتینكه‌كی لروویی گوله‌گی. . خاتر خواست
چوو. . ده‌ستمال هێلا. . ،
بێهنا وی ئاوازی سترانه‌كا زه‌ره
چناره‌كا ئاشقه دده‌می ماچبارانی. . دگه‌ل سپیندارا
چوونه‌كا بله‌زه. . وه‌ك گڤینا بای ده‌ما ده‌ستی خو ب به‌ژنا
شلێرا دبه‌تن
روح سیلاڤه‌كا ماندییه
نه‌شێت په‌رتوكێن ئه‌شقی ته‌ڕ كه‌تن
ته‌ڕگه‌كا هاره سه‌ری جه‌نگه‌ل و دارستانا دشۆتن
بتنی سیتافكا مه لسه‌ر رێكی
تو لبن زه‌ندا من گه‌له‌ك ناسكی
پرچا ته دفری
پیاسا مه شه‌ڤه‌كا هار و سه‌رخۆشه دئامێزا دارستانه‌كا قه‌یره‌دا
نزانیت چه‌وا كه‌لا خو دارێژیتن
جار ماچ دكه‌ته چاڤێن بیهۆكا
جار ماچ دكه‌ته سینگی سنۆبه‌را
جار دگه‌ل چویچكا دخه‌و دچیت
