|
زانا یان شێخ زانا؟!. ئه‌مجاره‌شیان راگه‌یاندنی كوردی شكستی هێنا ...
مه‌ریوان نه‌قشبه‌ندی
ئه‌وه‌ی تا ئێستا له‌كه‌ناڵه‌كانی راگه‌یاندنی كوردیه‌وه (زۆربه‌یان) .
سه‌باره‌ت به‌گروپی تاوانباری زانا ده‌یبینین و بیستومانه و
خوێندومانه‌ته‌وه. جگه له‌شكستێكی نوی بۆ راگه‌یاندنی كورد شتێكی ئه‌وتۆ
نابینین. ئه‌مه‌ش واده‌كات له‌مه‌ودوا زیاتر پێویستیمان به راگه‌یاندنێكی
واقعی و ئازاد بێت. ماوه‌یه‌كه زۆربه‌ی كه‌ناڵه‌كانی راگه‌یاندنی كوردستان
ریكلام و دواتریش دانپێدانانی گروپێكی تاوانبار و تیرۆرستی به راپۆرت و
زنجیره‌ی یه‌ك له‌دوای یه‌ك بڵاو ده‌كه‌نه‌وه و هه‌تا ئێستاش ئه‌م
كه‌ناڵانه‌ی راگه‌یاندن وه‌ك ئه‌ندامانی گروپه‌كه‌ی (زانا) به‌م تیرۆرسته
ده‌ڵێن (شێخ زانا) و مانشێتی رۆژنامه‌كانی پێپرِده‌كه‌نه‌وه. ئه‌م وه‌سفه
دوای هه‌موو ئیعتیرافاتی (زانا) و ئه‌ندامانی دیكه‌ی بانده‌كه‌ی دێت.
كه‌واته له‌و رۆژه‌وه‌ی (شێخ زانا) دانی به تاوانباریی خۆیداناوه.
له‌روی كۆمه‌ڵایه‌تی و ئه‌خلاقی و له رِووی یاساییشه‌وه شێخایه‌تی
له‌سه‌ر خۆی لاداوه و پێویستیش وابوو هه‌ر له‌و رۆژه‌وه به (زانای
تاوانبار) وه‌سف بكرایه نه‌ك به (شێخ زانا) كه نیگه‌رانیه‌كی زۆری
له‌ناو خه‌ڵكی كوردستاندا دروستكردوه و ئێستا وا هه‌ست ده‌كرێت لكاندنی
وشه‌ی (شێخ) به تاوانبارێكی وه‌ك (زانا) دوای ئیعتیرافكردنی. كارێكی
عه‌مده‌ن و (مقێود) ه. و بۆ ناسین و ناسینه‌وه‌ی ئه‌و تاوانباره نیه
وه‌ك هه‌ندێك له كه‌ناڵه‌كانی راگه‌یاندن ده‌یانه‌وێت سه‌ركردایه‌تی
حزبه‌كانی پی بخه‌ڵه‌تێنن. به‌ڵكو له‌وانه‌یه بۆ ته‌سفیه‌ی حسابات و
ئایدیۆلۆجیای كۆن بێت و هه‌روه‌ك هه‌ندێك له مامۆستایانی ئاینی ئیسلامی
كوردستان ده‌ڵێن ئێستا كه‌ناڵه‌كانی راگه‌یاندنی كوردستان له‌لایه‌ن كۆنه.
. . . . . و كه‌سانی دژ به ئاینی ئیسلام كه ئاینی (%98) ی دانیشتوانی
كوردستانه. به‌رِێوه ده‌برێن. مامۆستایانی مزگه‌وته‌كانی شاری هه‌ولێر
له‌وتاری یه‌كه‌م هه‌ینی دوای بلاَوكردنه‌وه‌ی ئیعتیرافاته‌كانی ئه‌و تۆره
تیرۆرستیه له‌كاتێكدا داوای دادگایی و له‌سێداره‌دانی ئاشكرای ئه‌و
تاوانبارانه‌یان ده‌كرد سه‌رسورِمانی خۆیان له به‌رده‌وامبوونی
كه‌ناڵه‌كانی راگه‌یاندن به‌وه‌سفی زانای تاوانبار به (شێخ زانا)
ده‌ربرِی. جا ئه‌گه‌ر بۆچونی ئه‌و مامۆستایانه راست بێت ئه‌وا ئاشكرابوونی
دۆسێی (زانا) و ته‌غتیه‌كردنی له‌كه‌ناڵه‌كانی راگه‌یاندندا نه‌ك هه‌ر
سه‌ركه‌وتوو نه‌بوه به‌ڵكو گرفتی زیاتریش له‌نێوان خه‌ڵكی كوردستان و
سه‌ركردایه‌تی حزبه‌كاندا درووست ده‌كات.
كه‌ناڵه‌كانی راگه‌یاندن بیانه‌وێت و نه‌یانه‌وێت شێخه‌كانی كوردستان
به‌شێكی گه‌وره‌و كاریگه‌رن له كۆمه‌ڵگا و مێژووی كوردستان و وشه‌ی (شێخ)
به‌مانای كه‌سێكی به‌ته‌مه‌ن و رێزلێگیراو گوتراوه و هه‌ندێك جاریش
له‌سه‌ر ره‌وشتی به‌رز و رێزگرتنی خه‌ڵكی به كورِه شێخه‌كانیان گوتوه
(شێخ) به‌ڵام كاتێك ئه‌و كه‌سه به هه‌ڵسوكه‌وت و قسه‌ی خۆی ئه‌م رِێزه‌ی
نه‌هێشت ئیتر نازانم چۆن كه‌ناڵه‌كانی راگه‌یاندن هێشتا سورن له‌سه‌ر
پێدانی وه‌سفی شێخایه‌تی؟!. ئێستاشی له‌گه‌ڵدابێت زۆربه‌ی كه‌سایه‌تیه
سیاسی و ئه‌كادیمی و كۆمه‌ڵایه‌تیه‌كانی كوردستان به‌شی هه‌ره‌گه‌وره‌ی
بنه‌ماڵه‌ی شێخه‌كانی كوردستان پێكدێنن و مێژووی كوردستانیش شاهیده كه
هه‌رگیز توندرِۆیی و تاوان و جینایه‌ت له‌ناو ته‌كیه و خانه‌قاكانی
كوردستان نه‌بووه و تێكدان و ده‌رهێنانی روفات و مه‌زاره‌كانی شێخانی
نه‌قشبه‌ندی له ناوچه‌ی هه‌ورامان له‌لایه‌ن گروپه به‌ناو ئیسلامیه
تیرۆرسته‌كانه‌وه نیشانه‌ی ئاسته‌نگی گه‌وره‌ی ته‌ریقه‌ت و شێخه‌كانی
كوردستان بووه له‌به‌رده‌م مه‌رام و ئامانجه گڵاوه‌كانی تیرۆرسته
(به‌ناو ئیسلامیه‌كان) . هه‌روه‌ها له‌ناو شێخانی به‌رزنجیشدا سه‌دان
ئه‌كادیمی و پیاوچاك و مرۆڤدۆست و كورد په‌روه‌ر و شه‌هید و پێشمه‌رگه
هه‌ڵكه‌وتووه.
له‌كاتێكدا ئه‌م به‌رگریه له شێخه‌كانی كوردستان و پیرۆزیی وشه‌ی (شێخ)
له‌ئیسلامدا ده‌كه‌م ده‌مه‌وی خوێنه‌ری به‌رِێز بزانێت نوسه‌ری ئه‌م
بابه‌ته هیچ ئیلتیزاماتێكی شێخایه‌تی نیه و هه‌ڵگرتنی نازناوی
(نه‌قشبه‌ندی) شم. بریتیه له هه‌ڵگرتنی ناوی بنه‌ماڵه‌كه‌م كه هه‌میشه
شانازی پێوه ده‌كه‌م وحه‌قه گه‌لی كوردیش شانازی به‌وه بكات كه زۆربه‌ی
سه‌ركرده نه‌ته‌وه‌یی و نیشتمانیه‌كانی له بنه‌ماڵه‌ی شێخه‌كانی كوردستان
بوون و تا ئێستاش به‌دیلی ئه‌م سه‌ركردایه‌تیه په‌یدا نه‌بوه و چاوه‌رِێش
ناكرێت له‌ئاینده‌دا به‌دیلێكی باشتر په‌یدا ببێت. ئه‌ویش به‌هۆی پێكهاته
و سستمی كۆمه‌ڵایه‌تی كورد و كوردستانه و نابی له‌م واقیعه خۆمان
بدزینه‌وه.
كه‌ناڵه‌كانی راگه‌یاندن له مه‌سه‌له‌ی زانا دا هه‌وڵیاندا په‌رده‌پۆشی
ئه‌و گه‌نده‌ڵی وبێپلان و بی به‌رنامه‌ییه بكه‌ن كه پێشتر له‌ده‌زگاكانی
ئاسایش و پۆلیسی كوردستاندا هه‌بووه. هه‌روه‌ها هه‌وڵیشیاندا ئه‌و راستیه
بشارنه‌وه كه حزبه سیاسیه‌كانی كوردستان و به‌تایبه‌تیش (حزبه
ده‌سه‌لاَتتداره‌كان) هۆكاری په‌یدابوونی كه‌سانی وه‌ك زانا و تۆره
تیرۆرستیه‌كه‌ی بوون و هه‌تا ئێستا ژماره‌یه‌ك له‌و ئیسلامیه توندرِۆیانه
كه‌پێشتر هه‌موو كوردستانیان به‌كافر زانیوه و تۆوی ته‌كفیر و جیهاد و
سه‌له‌فیه‌تیان له‌كوردستاندا وه‌شاند. له‌ناوجه‌رگه‌ی حزبه‌كانی كوردستان
و له‌وانه‌شه له‌نزیك كاربه‌ده‌ست و برِیارده‌ره‌كانی كوردستان بن و ئه‌م
ئیختیراقه‌ی ئیسلامیه توندرِۆكان كه‌ناڵه‌كانی راگه‌یاندن و له‌وانه‌شه
ده‌زگاكانی راگه‌یاندنی حزبه‌كانیشی گرتبێته‌وه و ئێستا به گۆشه‌یه‌كی
180 ده‌ره‌جه‌یی له‌وپه‌رِی توندرِۆییه‌وه بوونه‌ته دیموكراسی و عه‌لمانی
و خۆیان به‌فریشته پیشان ده‌ده‌ن. هه‌ندی جاریش ئێمه به‌كه‌مته‌رخه‌م و
دواكه‌وتوو و كۆنه‌په‌رست له‌قه‌ڵه‌م ده‌ده‌ن.
خه‌ڵكی كوردستان قه‌ناعه‌ت به‌وه ناكات كه‌پیشاندان وئیعتیرافاتی كۆمه‌ڵێك
هه‌تیوباز و نێرباز وسه‌ربرِی مێردمنداڵ. كه‌وه‌ك له‌ته‌مه‌ن و
ئیعتیرافاته‌كانیاندا به‌دیار ده‌كه‌وێت نه‌خۆشی (جنسی) یان هه‌بووه و
كه‌وتونه‌ته ژێر هه‌ره‌شه‌و كاریگه‌ریی كۆنه ئیسلامیه‌كی توندرِۆ.
بكه‌نه ده‌سكه‌وت و بیانه‌وێت خه‌ڵكی كوردستان والێبكه‌ن پرسیاری ئه‌و
تۆره تیرۆرستیه ته‌كفیریانه نه‌كه‌ن كه چه‌ندین ته‌قینه‌وه‌ی
گه‌وره‌یان له ناوچه‌جیاجیاكانی كوردستاندا ئه‌نجامداوه و هه‌ره‌شه‌ی
گه‌وره له ئاسایشی نه‌ته‌وه‌یی كورد ده‌كه‌ن. خه‌ڵكی ده‌پرسێت كوان ئه‌و
هه‌موو ئیسلامیانه‌ی كه مزگه‌وته‌كانی كوردستان و به‌تایبه‌تیش
مزگه‌وته‌كانی هه‌ولێری پایته‌ختیان كردبوه مۆڵگه و باره‌گای حزبایه‌تی؟؟
و له‌سه‌رده‌می شه‌رِی ناوخۆدا به چه‌ندین تیرۆرستی بیانی و به‌سه‌دان
لاوی كوردستان له‌م مزگه‌وتانه‌دا ته‌راتێنیان ده‌كرد و ماوه‌یه‌كیش بونه
دێوه‌زمه له حزبه عه‌لمانی و نه‌ته‌وه‌ییه‌كانی كوردستان وتۆوی خۆكوشتن
و خۆته‌قاندنه‌وه و توندرِۆیی و وه‌هابیه‌تیان له‌كوردستان چاند. بێگومان
ئه‌وانه زۆربه‌یان ماون و له‌كوردستاندا بازبازێنی حزبایه‌تی ده‌كه‌ن و
دوئیداره‌یی كوردستان و لاوازیی ته‌نسیقی ئه‌منی له‌نێوان ده‌زگاكانی
ئاسایشی هه‌ردووئیداره‌دا و نائارامی عێراقیش هه‌موویان هۆكارن بۆ
سه‌رله‌نوی په‌یدابوونه‌وه‌ی ئه‌و كه‌سانه. ده‌ستگیر كردنی چه‌ند
كه‌سێكیان دوای هه‌ر ته‌قینه‌وه و كارێكی تیرۆرستی. و دواتریش سه‌رله‌نوی
ئازاد كردنیان و هه‌ندی جاریش موجامه‌له كردنیان و (به‌حساب كه‌سب
كردنیان) بۆ ناو حزبه‌كانی كوردستان هه‌ڵه‌یه‌كی گه‌وره‌یه‌و
به‌رده‌وامبوونی ئه‌م هه‌ڵانه ده‌بێته هۆی سه‌رهه‌ڵدان و چالاك بوونی
چه‌ندین گروپی هاوشێوه‌ی گروپه‌كه‌ی زانا. به‌پێی ئه‌زموون و گفتوگۆكردنم
له‌گه‌ڵ ئه‌ندامانی حزبه ئیسلامیه‌كانی كوردستان و عێراق و سعودیه و
كوێت. ئه‌و كه‌سه‌ی له‌سه‌ر فكری وه‌هابیه‌ت گۆش كرابێت وه‌ك ئیسفه‌نج
وایه كاتێك پێی پێدا ده‌نێیت پان و بچوك ده‌بێته‌وه به‌ڵام دواتر
قه‌باره‌ی خۆی وه‌رده‌گرێته‌وه‌و هه‌رگیز پاشگه‌زبوونه‌وه و په‌شیمان
بوونه‌وه له‌لای ئه‌م ته‌كفیریه سه‌له‌فیانه وجوودی نیه و ئه‌گه‌ر
حاڵه‌تێكی له‌و شێوه‌یه بینرا ئه‌وا وه‌ك پشووی نێوان دوو گێمه‌كه‌ی یاری
تۆپی پی وایه.
پیشاندانی تۆره‌كه‌ی (زانا) و گه‌یاندنیان به سزای عادیلانه‌ی خۆیان
هه‌نگاوێكی باشه بۆ رای گشتی ناوخۆ و جیهان و ده‌سكه‌وتێكی گه‌وره‌شه بۆ
ئاسایشی نه‌ته‌وه‌یی كوردستان. به‌ڵام كورتبینی و ناشاره‌زایی له
ته‌غتیه‌كردنی رِوداوه‌كه و مامه‌ڵه‌كردنی هه‌ڵه‌ی كه‌ناڵه‌كانی
راگه‌یاندن له‌گه‌ڵ قورسایی و قه‌باره‌ی ئه‌و تۆره تیرۆرستیه دوای
داننانیان به‌تاوانه‌كانیاندا. واده‌كات چه‌ند پرسیارێك به‌بی وه‌ڵام
بمێنێته‌وه و ئه‌و بۆشاییه‌ی له‌نێوان خه‌ڵكی كوردستان و ده‌زگا
ئه‌منیه‌كانیدا هه‌یه بۆ ماوه‌یه‌كی دیكه‌ش هه‌ر به‌رده‌وام بێت.
ئه‌وه‌ی تائێستا له‌و تاوانبارانه‌مان بیستوه. زیاتر خه‌ریكی جنس و
نێربازی و بێئه‌خلاقی بوون و به‌رِێگای ره‌فاقه‌ت و له‌سه‌ر بنه‌مای خواستی
موماره‌سه‌كردنی جنسی له‌لای نێچیره‌كانیان مامه‌ڵه‌یان له‌گه‌ڵدا كردوون و
قسه‌كانی (زانا) بۆ دروستكردنی موخابه‌راتێكی ئیسلامی. ته‌نها بۆ
شه‌رعیه‌تتدان و قه‌ناعه‌ت پێكردنی چه‌ند لاوێكی (نه‌خۆش له رووی جنسی و
ده‌رونی) ه‌وه بووه بۆ كاری جنسی و نێربازی و له‌وانه‌شه زانا توانیبێتی
له‌رِێگای وێنه‌گرتنی دیمه‌نی سه‌ربرِین و پارچه پارچه كردنی چه‌ند
كه‌سێكی بێتاوان له‌لایه‌ك به‌رپرسێكی سه‌ربه گروپه جیهادی و
ته‌كفیریه‌كانی عێراقی خه‌ڵه‌تاندبێت و هاوكاری مادی و لۆجستی لێوه‌رگرتبن
و هه‌ندی جاریش ئاسانكاری كردبێت بۆ تاقمه تیرۆرستیه‌كانی ده‌ره‌وه‌ی
كوردستان و شوێنه هه‌ستیاره‌كانی كوردستان و دام و ده‌زگا ئه‌منی و
حزبیه‌كانی پێ پیشان دابن. له‌لایه‌كی دیكه‌شه‌وه هه‌موو ئه‌ندامه‌كانی
گروپه‌كه‌ی خۆی پێتۆقاندبێت و به‌جۆرێك ترساندبنی كه نه‌توانن رۆژێك
له‌رِۆژان هیچ نهێنیه‌كی ئه‌م تۆره تیرۆرستیه بدركێنن یان لێی قوتاربن.
ده‌لیلیشم بۆ ئه‌م تێرِوانینه من له‌ساڵی رابردو له‌سه‌فه‌ری حه‌جی
حاجیانی كوردستاندا بووم بۆ عه‌ره‌بستانی سعودی. ئه‌م زانایه له‌گه‌ڵ
دایكی و خێزانه‌كه‌ی له هه‌مان ئه‌و كاروانه‌دا بوو كه منی تێدابوو.
چه‌ندین به‌رپرسی گه‌وره‌ی حزبی و حكومیشمان له‌گه‌ڵدابوو كه ئه‌گه‌ر زانا
وه‌ك سه‌ره‌زله‌كانی دیكه‌ی گروپه تیرۆرستیه‌كان ترسنۆك نه‌بوایه‌و
بیویستایه به‌رپرسان تیرۆر بكات ئه‌وا له‌رِێگای سه‌فه‌رێكی 10 رۆژیدا
له‌كوردستانه‌وه بۆ عه‌ره‌بستانی سعودی كه له‌بارودۆخێكی زۆرخراپ و
نائارامدا به رِێگای زه‌مینی له‌هه‌ولێره‌وه به‌ناو به‌غدا و زۆربه‌ی
شاره‌كانی ناوه‌راست و باشووری عێراقدا تێپه‌رِبووین. زۆرئاسان بوو بۆ زانا
كه هه‌وڵی تیرۆركردنی به‌رپرسان بدات. به‌ڵام من هیچ شتێكی نائاساییم
لێبه‌دی نه‌كرد و له‌به‌رئه‌وه هه‌ست ده‌كه‌م (زانا) ویستوێتی نێربازی و
كه‌موكورِیه جنسیه‌كانی له‌سه‌ر خه‌ڵكی هه‌ژار و مێردمنداڵ تاقی بكاته‌وه
و تۆڵه‌ش له‌و خه‌ڵكه بكاته‌وه كه له‌سه‌رده‌می تاقمی (جیهاد و ته‌وحید)
دا قه‌ناعه‌تیان به بیرو بۆچونه ته‌كفیریه‌كه‌ی نه‌هاتوه و ناچاربوو
به‌م شێوازه درێژه به ئیسلامه‌تی خۆی بدات و ئه‌وه‌ی بۆ خه‌ڵكی كوردستان
ئیسپات كرد كه (ته‌وبه‌ی گوورگ مه‌رگه) و ده‌بی حزب و دام و ده‌زگاكانی
كوردستانیش بزانن كه ئه‌و مێشكه‌ی به فكری سه‌له‌فیه‌ت و وه‌هابیه‌ت
پرِكرابێت. نابی چاوه‌رِێی خێری بۆ كورد و مرۆڤایه‌تی لێبكرێت.
Mariwan_na@yahoo. com
| 
