مۆدێلێـکی تری دیموکراسی له عێراقدا!! ...  شاهـــۆ تۆفیق

 

به‌ته‌نها رماندنی سیستمی دیکتاتۆری؛ به‌س نییه‌ بۆ ئه‌وه ی دیموکراسی بێته‌گۆڕێ. به‌ڵکو ئه‌وه‌ سه‌ره‌تایه‌که‌ بۆ خۆشکردنی زه‌مینه‌ی له‌دایکبوونی دیموکراسی و. پاشان ره‌وکردن به ره‌و گه‌شه‌سه ندن و خه‌مڵاندنی ئه‌و پرۆسه‌یه‌.

ئه‌گه‌ر ره‌فتاره‌کانی دیموکراسی. ته‌واو پێچه‌وانه ی ره‌وشتی دیکتاتۆری بن؛ ئه‌وا کاتێکی باشی ده‌وێ. بۆ راستکردنه‌وه‌ی هه‌موو هه‌ڵه‌کانی پێش خۆیی و. به‌وه‌ش پرۆسه‌ نوێیه‌که‌ پێویستی به‌ میتۆدێکی ترده‌بێ‌. بۆ له‌ڕه‌گه‌وه‌ گۆڕینی سه رتاپا ره‌وشته‌کانی پێشوو.

دیموکراسی. هێڵی په‌یوه‌ندیی نێوان ده‌سه‌ڵات و هاووڵاتیه‌و. پـێوه‌ری ئه‌و په‌یوه‌ندیه‌ش " ئه‌رک و ماف " ده‌ستنیشانی ده‌کات. واتا پـیاده‌کردنی سیستمی دیموکراسی؛ پوکاندنه‌وه‌ی دیکتاتۆری و بانگه‌شه‌ی ئازادی نیه‌ به‌ته‌نها! به‌ڵکو هه‌وڵدانه‌ بۆ سڕینه‌وه‌ی ره‌گو ڕیشه‌ی ئه‌و ئایدۆلۆژیایه‌ی سیستمه‌ دیکتاتۆریه‌که‌ی له‌سه‌ر بونیادنراوه‌ و. پاشانیش فه‌راهه‌مکردنی به‌رزترین ئاست بۆ پاراستنی ئازادی. . . ئازادیه‌ک. رێزی مرۆڤی تیا پله‌یه‌ک بێ و. ماف بداته‌وه‌ به‌ مافخوراوان و. یاساش بکاته‌ سه‌روه‌ر و داپڵۆسێنه‌ری ئه‌وانه‌ی ئازادیان خنکاندبوو.

ئه‌وه‌ی له‌ عێراقدا روویدا؛ تێکه‌ڵه‌یه‌ک بوو له‌ گۆڕانکاری و هه‌ڵچوون و داچوون. دیکتاتۆری به‌ مانا گه‌وره‌و تاکڕه‌ویه‌که‌ی هه‌ره‌سی بردو نه‌ما. به‌ڵام ئه‌فسووس له‌و ئانجامه‌دا چه‌ندین ورده‌ دیکتاتۆر له‌ پریشکی ئه‌و وردبوونه‌دا لێره‌ و له‌وێ دروستبوون و گیرسانه‌وه‌و. ئازادی سه‌رکووتده‌که‌ن.

یه‌کێک له‌و دیاردانه‌ی که‌ ئێسته‌ به‌ ناوی دیموکراسیه‌وه‌ ده‌پارێزرێ و به‌هێمنی گه‌شه‌ده‌کات! گه‌ڕاندنه‌وه‌ی تاوانباره‌ دێرینه‌کانه‌. هه‌م بۆ نێو کۆمه‌ڵگه‌ و هه‌م بۆ ریزی ده‌زگاکانی حکومه‌ت و. به‌ بیانووی ئاشتبوونه‌وه‌ی گشتیه‌وه‌ لێـیان ده‌بوورن. ئه‌وانه‌ی له‌ شاره‌کانی کوردستان و شوێنه‌کانی تردا؛ مه‌قاشی سه‌ددامیه‌کان بوون و تاوانیان ئه‌نجامده‌دا! ئێسته‌ به‌ ناوی هه‌ڵدانه‌وه‌ی لاپه‌ڕه‌ی نوێوه ده‌ستی ئاشتیان بۆ درێژ ده‌کرێ.

لایه‌نی ئه‌مریکی. هه‌رچه‌نده‌ خۆی به‌ پارێزه‌ری ماف و بانگده‌ری دیموکراسی ده‌زانێ!! به‌ڵام بێـپه‌روا هه‌وڵی رازیکردن و دڵدانه‌وه‌ی سه‌رگه‌ردانه‌ به‌عسیه‌کان ده‌داو. به‌ بیانووی پاراستنی ئاسایش و کپکردنی ئیسلامیه‌ توندڕه‌وه‌کانه‌وه‌؛ به‌ شنه‌بای دیموکراسی پێشوازی له‌ جه‌للاده‌کانی زه‌مه‌نی سه‌ددام ده‌کات.

حکوومه‌ته‌که‌ی جه‌عفه‌ریش. که‌ په‌یمانی هه‌ڵته‌کاندنی قه‌ڵای تاوانبارانی دابوو!! له‌جیاتی ئه‌وه‌ی ورده‌جه‌للاده‌کانیش به‌ سه‌رانی به‌عسه‌وه‌ ره‌وانه‌ی دادگا بکات! له‌جیاتی ئه‌وه‌ی خه‌ڵکی سڤیل بپارێزێ و. دڵی شکاوی زیانلێکه‌وتووه‌کان بداته‌وه‌! زۆر بێباکانه‌ خۆی له‌ مافی که‌رکوک و شوێنه‌کانی تر لاده‌داو ده‌یه‌وێت مادده‌ی 58 ی (له‌بنه‌ڕه‌تدا دواکه‌وتوو) دواتربخا. ئه‌م ره‌وشه‌ش له‌ کوردستاندا ئه‌رخه‌وانیتر نییه‌. سه‌دان تاوانباری ده‌ستبه‌خوێن سوور هه‌بوون که‌چی تائێسته‌ نه‌ماندی هۆڵی دادگه‌کان سزای تاوانی ئه‌وانه‌یان تیا بخوێندرێته‌وه‌. ئه‌ویش هه‌ر به‌ ناوی دیموکراسیه‌وه‌یه‌.

ئه‌م مۆدێله‌ نوێـیه‌ی دیموکراسی؛ که‌ به‌ لێبووردنی خوێنڕێژان ده‌ستپێده‌کات. کۆتاییه‌که‌ی شێواندنی به‌ها جوانه‌کانی سه‌ربه‌ستیی مرۆڤه‌ و دژی گه‌ڕاندنه‌وه‌ی مافه‌کانه‌. ئه‌مه‌ مۆدێلێکه‌ به‌ نـاوی دیموکراسیه‌وه‌. دیموکراسی ده‌خنکێنـــــــێ.