ئامۆژگاری و گازنده‌ی شاعیرێکی عاشق ... خاڵه‌حه‌مه‌

 

هه‌زارجارمان ڕاته‌کاندن

ڕانه‌چڵه‌کین!!

ئێوه‌خۆتان که‌ڕووکاسن

کوڕی چۆپی و هه‌ڵپه‌ڕین و

هه‌زارباسن

ئێوه‌ خۆتان ده‌می داسن

بۆ دروێنه‌ی سه‌ری یه‌کتر

فره‌خاسن

بۆ کوشتنی ڕۆحی ئێمه‌ش

به‌هێزترن

له‌ (گا) و (گاسن) !!

چه‌نده‌ها جار بانگیشماندا

به‌ گوێی شارا

ئه‌ڵقه‌ڕێزی

گشت ده‌رگاکانمان ڕاته‌کان. .

له‌به‌ر په‌نجه‌ره‌و دووده‌ره‌ی ماڵه‌کاندا

هاوارمان کرد

عێراق ووڵاتی تاوان‌ و

بیری ڕه‌شی

په‌رچه‌م ڕه‌شی عه‌ره‌بیه‌!!. .

سه‌ربه‌گۆبه‌نگ

پاشماوه‌ی جه‌نگ

دوژمنی ڕه‌ش و سپییه‌!!

هاوارمان کرد

ووتمان عه‌شق له‌ ئامێزکه‌ن

گه‌ر به‌نیازن

تاکه‌ گوڵی سه‌رفرازیتان ده‌ستکه‌وێ‌. .

تا دوژمنه‌ دڵ ڕه‌شه‌‌که‌ی نه‌وه‌کانتان

ده‌ستی له‌گه‌ردن نه‌که‌وێ. .

تا کوڕانی (الاعراب) و (تورک و عه‌جه‌م)

ده‌ست نه‌گێڕن به‌ژێر (به‌ڕه) ‌و

به‌ناو (کوپه) ‌و

به‌گه‌نجینه‌ی پڕ زێڕتانا. .

ده‌ست وه‌رنه‌ده‌ن

له‌دوو لیمۆی باخی سیینه‌و‌

 (به‌ها) کانی سه‌رجێتانا. .

پێمان ووتن

هه‌موو ڕابن

عه‌شق به‌خته‌و

ته‌نها جارێک که‌وی ئه‌بێ. .

عه‌شق ژینه‌و

که‌پێت لێ نا ڕیسوا ئه‌بێ. .

عه‌شق ژنه‌ و

ماچی نه‌که‌ی ئه‌تبوغزێنێ. .

عه‌شق کچه‌و

دڵی خۆتی پێنه‌به‌خشی ئه‌تگرێنێ. .

عه‌شق ئه‌سپێکی سه‌رکه‌شه‌

یاڵ و پرچی دانه‌هێنی ئه‌تگلێنی. .

پێمان ووتن

هه‌موو ڕابن

مێژووی چڕوپڕی ئێمه‌

پڕه‌ له‌خه‌ون

هه‌ریه‌که‌یان

چه‌ند سه‌ده‌یه‌ک ته‌مه‌نیه‌تی. .

پڕیه‌ له‌ته‌ون

هه‌ریه‌که‌یان

داگیرکارێ چنیویه‌تی. .

پڕیه‌ له‌ڕه‌نگ

هه‌ریه‌که‌یان

ژه‌نگ و مۆریان خواردویه‌تی. .

پڕیه‌ له‌ده‌نگ

هه‌ریه‌که‌‌یان

له‌به‌رده‌رگای سوڵتانێکی

بێ شکۆدا ژانگرتویه‌تی. . !!

پڕیه‌ له‌جه‌نگ

هه‌ریه‌که‌یان

ده‌ستی خێڵێ

ئه‌نگاوتویه‌تی!!

ئای له‌م خاکه‌

پڕله‌زێڕه‌ی کورد هه‌یه‌تی

چه‌ند نه‌گبه‌ته‌

چه‌ند تامه‌زرۆی سه‌ردارێکی

به‌هه‌یبه‌ته

به‌هیمه‌ته‌

له‌ژێر ئاڵای باپیره‌یدا

‌به‌ڕامان و (شید) ی خوایی

به‌گفتاری پڕسه‌لیقه‌ی بێکۆتایی. .

به‌کرداری جوان و پیرۆز

گه‌ش کاته‌وه‌ ئاگری هۆز. .

له‌سه‌ر کورسی زێڕو فه‌رمان

دابنیشێ

دڵی کوردی لێ نه‌ێشێ

جارێکیتر کورد نه‌فرۆشێ

کورد نه‌فرۆشێ. .

خاڵه‌حه‌مه‌/دانمارک/ڤالبی24/6/2005

 

تێبینی

ــــــــــ

1) (به‌ها) گه‌وره‌یی. . نرخ. . گران. .

2) (شید) تیشکی پیرۆز. . (نوور) . .